ත්‍රස්තවාදය වැළැක්වීමේ පනත අහෝසි කිරීමට කමිටුවක්

ත්‍රස්තවාදය වැළැක්වීමේ පනත අහෝසි කිරීම පිළිබඳව සොයා බලා නිර්දේශ ඉදිරිපත් කිරීමට කමිටුවක් පත්කර තිබේ. ජනාධිපති නීතිඥ රියෙන්සි අර්සකුලරත්න මහතාගේ සභාපතීත්වයෙන් යුක්තව අදාළ කමිටුව පත්කර ඇති බව අධිකරණ සහ ජාතික ඒකාබද්ධතා අමාත්‍යංශය සඳහන් කළේය. ත්‍රස්තවාදය වැළැක්වීමේ පනත අහෝසි කිරීමට අදාළව මූලික සාකච්ඡාවක් අධිකරණ සහ ජාතික ඒකාබද්ධතා අමාත්‍ය නීතීඥ හර්ෂණ නානයක්කාර මහතාගේ ප්‍රධානත්වයෙන් පසුගියදා පවත්වා තිබේ. එහිදි මෙම කමිටුව පත් කර ඇති අතර දැනට පවතින ත්‍රස්තවාදය වැළැක්වීමේ පනත අහෝසි කිරීම වත්මන් ආණ්ඩුවේ ප්‍රථිපත්තිය බව අමාත්‍යවරයා ප්‍රකාශ කර ඇත. නව පනත ගෝලීය ත්‍රස්තවාදයට සහ අභියෝගයන්ට මුහුණදිය හැකි ආකාරයේ පනතක් විය යුතු අතර අන්තර් ජාතික වශයෙන් පිළිගන්නා මෙරට ව්‍යවස්ථාවෙන් ද සහතික කර ඇති මානව හිමිකම් අදහස් ප්‍රකාශ කිරීමේ අයිතීන් කඩ නොවන අකාරයේ පනතක් විය යුතු බව හර්ෂණ නානයක්කාර අමාත්‍යවරයා අවධාරණය කර තිබේ. පත් කර ඇති මෙම නව කමිටුව ඉතා කෙටි කාලයක් තුළ මෙම පනත අහෝසි කිරීමට අදාල කරුණු සාක්ෂාත් කළ යුතු බවයි අමාත්‍යවරයා වැඩිදුරටත් දැනුම්දී ඇත. මේ සම්බන්ධයෙන් මැයි මස මුල් කාලය තුළ මහජන අදහස් හා සිවිල් සංවිධානවල අදහස් ගැනීමට මෙන්ම අන්තර් ජාතික ආයතන හා ප්‍රජාවන්ගේ අදහස් ලබා ගැනීමට ද නියමිතය.